M
Mikutano sita ya Mgombea Urais wa Chama cha ACT Wazalendo, Mheshimiwa Othman Masoud Othman, iliyofanyika kisiwani Pemba, imeacha alama kubwa ya matumaini, hamasa na mwamko mpya wa kisiasa kwa wananchi wa kisiwa hicho. Mikutano hiyo, ambayo imefanyika kutoka eneo la kusini mwa Pemba hadi kaskazini, imekuwa jukwaa muhimu la kusikiliza sauti za wananchi na kuonesha dira mpya ya maendeleo na mabadiliko.
Katika kila mkutano, maelfu ya wananchi wamejitokeza kwa wingi, wakijaa ari, matumaini na imani kwamba safari ya mabadiliko imeanza rasmi. Umati wa watu uliomiminika katika viwanja mbalimbali ni ushahidi wa wazi kuwa wananchi wa Pemba wamechoshwa na ahadi zisizotekelezwa, na sasa wanataka mwelekeo mpya unaojali utu, heshima na ustawi wao.
Mheshimiwa Othman Masoud amepata nafasi ya kukutana na makundi mbalimbali ya wananchi — wavuvi, wakulima, vijana, wajasiriamali na wazee — akisikiliza kwa makini kilio chao cha miaka mingi cha kutengwa na kukosa fursa za maendeleo.
Katika maeneo mengi aliyoyatembelea, amekutana na wavuvi wenye vifaa duni, wanaojitahidi kuvua kwa zana za kizamani, huku bahari ikibaki kuwa chanzo kikubwa cha kipato kisichotumika ipasavyo.
Wakulima nao wamemueleza jinsi mashamba yao yamekosa tija, kutokana na kukosekana kwa pembejeo, teknolojia na soko la uhakika.
Mheshimiwa Othman pia amekutana na wajasiriamali wadogo waliotelekezwa, wanaokosa mikopo na mafunzo ya kuboresha biashara zao.
Vijana kwa upande wao, wameeleza uchungu wa kukaa vijiweni bila ajira, licha ya kuwa na elimu na uwezo mkubwa wa kuchangia uchumi wa taifa.
Katika ziara yake, ameshuhudia miji muhimu ambayo imegeuzwa kuwa maeneo yaliyotelekezwa, wananchi wake wakihama kutokana na ukosefu wa miundombinu, huduma bora za afya na elimu.
Hali hiyo imeonyesha wazi pengo kubwa kati ya ahadi za serikali zilizopita na hali halisi ya maisha ya wananchi.
Hata hivyo, Othman Masoud ameahidi kwamba chini ya Serikali ya ACT Wazalendo, hali hiyo itabadilika. Ameweka wazi kwamba serikali yake itakuwa ya watu — serikali itakayosikia, kutenda na kushirikiana na wananchi katika kila ngazi ya maendeleo.
Kwa jumla, mikutano hii sita imekuwa zaidi ya kampeni; imekuwa ni safari ya matumaini, safari ya kujenga uhalisia mpya wa Pemba yenye usawa, heshima na fursa kwa wote.
Wananchi wamepata nafasi ya kueleza matatizo yao, na kwa mara ya kwanza, wameona mgombea anayesikiliza na kuahidi kwa vitendo, si kwa maneno matupu.
Kama walivyosema baadhi ya wananchi walioudhuria mikutano hiyo, “Huyu si mwanasiasa wa maneno, ni kiongozi wa matumaini.”
Kisiwa cha Pemba sasa kimeamka , kimepata sauti mpya ya matumaini inayoitwa Othman Masoud Othman.
